又遇上一位本地行乞者
Added 2020-06-15 01:11:42 +0000 UTC話說琴日下晝尖沙咀遇上已經反目嘅Moon之後，返屋企途中，遇到一個攞住紙杯，到處問人攞錢嘅老婦人，認識我嘅人都會知道，我一定唔會放過了解情況，呢個簡直係我30幾年嘅專業！我問呢個女人住邊度，佢聲稱住喺順天邨，呢個人年紀唔細都相信有70歲，牙齒都接近全部甩晒，但係講純正廣東話，加上而家防疫條例，更加肯定佢係本土嘅行乞者，佢同我解釋點解要行乞而唔去攞綜援？咁佢話因為公屋同個仔有名，申請唔到。咁我就問佢有冇社工跟進佢而家嘅情況，佢支唔以對，咁我話俾佢聽公屋還公屋，綜援還綜援，我叫佢主動搵社署社工跟進！佢又嫌煩，之後佢就開始講家事啦！（本土行乞者通常都係咁，因為冇發洩對象）佢話生活最無奈嘅地方係，自己已經冇錢工作好少，但屋企個仔同佢關係極差，個仔個老婆仲要每個月問佢攞膳食費！即係佢自己食飯，係要俾錢個新抱！其實我都相信香港都幾多呢啲家庭問題！聽完我再叮囑佢搵社工跟進我轉身就走啦！個老婦人仲係好大聲咁同我講「你唔明白我哋窮人屋企好多問題㗎！」我心諗，其實我明........因為比着以前嘅我，以我呢個巨蟹座性格，我係會主動攞埋佢地址，聯絡方法，之後幫佢搵埋社工，幫佢申請埋綜援，見埋佢屋企人處理斗紛.......過去30年我真係做得太多呢啲野！但係自從2014年之後，我就決定唔做，一來呢啲絕對唔係我嘅工作，啲議員死晒嘅！政府死晒嘅！二來最重要一點係往往我幫呢班人，通常都係藍絲底！真係幫完都好冇意思，你哋搵民建聯吧啦！
炸兩俠有啲工作係放棄咗㗎啦！吃力不討好！自討沒趣！最終又浪費自己時間同精神！不過補多句，通常朋友轉介需要幫助嘅黃底人士，我就一定幫！
