simonshen

【讀者分享🔥】火災後：咩係制度問題？

Added 2025-12-02 23:01:01 +0000 UTC

火災之後，網上討論鋪天蓋地。有人話起火源頭係棚架、網料，有人話係施工安全疏忽。但其實，呢啲只係表徵。真正要消除嘅，係背後嘅制度問題：官商勾結、圍標、法團黑幕。火災唔係單一事件，而係制度長期積累下嘅必然結果。

但係其實，法團嘅腐敗、強制驗樓嘅荒謬、地產商嘅黑幕，早就係香港人茶餘飯後嘅話題。唔通冇呢次火災，你就未聽過？

所以，當大家喺火災後高呼「制度問題」，我反而想問：咁究竟係咩制度問題？係安全管理？係工程監管？定係更深層次嘅政治經濟結構？

今次火災令我覺得最揪心嘅係，當上月中環華懋大廈發生同類事件。我唔知起火源因有冇人查或者追究。但宏福苑其實已有居民非常關注地盤火災風險問題，並要求回應，但一直都係石沉大海。彷彿預視自己屋苑會有同樣結果，卻投訴無門。

陳沛然醫生統計，今年已有六七單地盤火災，但每次都不了了之。制度上無人跟進，火災成為「新聞事件」，而唔係「制度警鐘」。呢種「預視卻無力改變」嘅無奈，正正反映制度失效。

KPI 政治與經濟數字

新市長上任第一日就講明要 KPI，要「以結果為目標」。無論你聽到係咩意思都好，但背後意思好明顯係：只要你搞得掂，可以無規無矩。咩係 KPI？一係國安，一係 GDP。小弟都唔係讀商科出身，也不懂班門弄斧。但 GDP 的公式還是中四經濟班第一堂課題，亦可以 google 一下。

GDP = C + I + G + (X − M)。C 係消費，I 係投資，G 係政府開支, (X-M) 係貿易易差。有左呢樣野，再睇下新巿長上任後以下香港經濟數據對比：

事實就算係 Consumption，2022 年只係因為疫情基數低﹐對比家下先好似有增長。香港2024 和 2025 年銷貨都比上年為低：

數字反映一切。

百業蕭條、生意冇晒，貿易逆差擴大，外部環境拖住後腿；但 GDP 竟然長期仲有增長，呢種反差嘅唯一解釋，只係政府開支同固定資本形成（工程投資）顯著上升，成為拉動 GDP 嘅力量。換句話講，香港而家 GDP 撐得住，已經唔係因為回歸後所謂六大產業，而係單單靠谷工程谷投資。北部都會區、明日大嶼冇晒錢都要起，除左眾所週知嘅向大陸利益輸送，「谷數字」亦係主因之一。

工程一死，就算香港唔死，首當其衝可能係市長死期。事實呢個邏輯唔止香港獨有，內地起呢樣果樣，造成空心經濟比香港更瘋狂，KC 博士成日講十億人三十億間屋就係呢個畸型經濟效果。計劃經濟下，中央只睇數字，無責任，只有指令。官員要保 GDP，谷工程，冇咩事都唔會理。冇咩事，即係就算一年七次地盤火災都叫冇咩事，冇人查冇人理，宏福苑火災就係呢個邏輯下嘅必然結果。

大家自己睇路

警鐘響起後，後續如何？喪事當喜事辦就梗架啦，拉幾條友制下旗，扮下野整頓下法團，Spin 去竹棚鐵棚圍網嘅爭拗，其實都差唔多。你睇呢兩日大公文匯幾咁積極，回應巿民話要查工程界黑幕。其實正正話你聽，工程界黑幕佢地係 WFC，抄晒出黎可能佢地更加維到穩。一雞死一雞鳴，有錢賺殺頭生意都梗有人做，換過另外一班更加聽話嘅仲正。

所以我就認為，工程界黑幕根本唔係源頭。真正制度問題，係「以結果為目標」，政府只睇 KPI，只睇 GDP，安全、透明、問責全部被犧牲，行事首要唔係保障市民，而係保障數字。

火災唔會煥醒任何人，因為上面制度唔會改。呢類型事件上面日日新鮮，武肺鑊過呢 D 萬倍計咪又係咁拆，你見今時今日都係無變過。要煥醒要改變嘅，只能係牆內嘅你地自己。下一次出事，仍然唔係偶然，大鑊好細鑊好，仍然唔係意外。

大家睇路。