英國新聞 倫敦李城坊發生持刀傷人事件 保安員救出受襲女童 13-8-2024
Added 2024-08-13 00:46:16 +0000 UTC
倫敦李城坊發生持刀襲擊事件，一名英勇嘅商店保安救咗一個正係遭受一名持刀男子襲擊嘅11歲女仔，而倫敦警察喺一份聲明中表示，一名32歲男子喺刺傷該名11歲女童同佢34歲嘅媽媽後已經被捕並拘留。警察之後喺現場繼續調查，呢個地點係英國首都倫敦最繁忙嘅旅遊區之一。
喺李城坊 TWG 茶店工作嘅29歲阿卜杜拉介入以阻止襲擊者，並喺同事嘅幫助下對該名女童進行咗急救。倫敦警察話目前佢哋相信呢次襲擊事件冇其他人參與，佢哋並冇追捕過疑凶以嘅其他人，而且唔相信受害者同襲擊者相識。警方亦表示，目前冇跡象表明呢次持刀傷人事件同恐怖活動有關。警方補充，呢名女仔因為嚴重嘅傷勢需要住院治療但冇生命危險，而佢母親嘅傷勢則「較輕」。
救人嘅保安阿卜杜拉話畀 BBC 知，佢聽到「一聲尖叫」，於是就跳到襲擊者身上並將刀踢開」。佢解釋話：「我聽到尖叫聲，即刻衝去外面，見到一個男人手上拎住刀。我一見到嗰把刀，就跳到嗰個人身上，抓住佢隻手⋯⋯將佢壓倒喺地，並將刀踢開。」佢表示，仲有幾個男人都過嚟幫手，將嗰個人壓制咗「四至五分鐘」。佢補充話，佢決定採取行動，因為「我冇時間多諗，只係冇考慮」。佢又話，喺警察接手之前，佢同同事對呢名小朋友進行咗急救。佢謙虛地話︰「我只係見到一個小朋友被刺傷，於是試圖救佢，」
另一名目擊者，名叫積奇琳，表示佢「聽到一聲大叫」，即刻跑過去，發現咗一個「可怕」嘅場景。「我見到一個年輕女仔同佢媽媽倒喺地上⋯⋯幾個男人將嗰個人壓倒喺地上。事情發生得非常快。警察隨後趕到，然後救護車亦嚟咗。我見到現場有好多血。呢度係我成日嚟嘅地方，所以我感到好驚。事情隨時可能發生，唔理你喺邊。通常呢個區域有好多警察。因為呢度係一個旅遊景點。」一名喺事發地點對面工作嘅男子（唔願透露身份）表示，佢當日早啲時候曾經見過嫌疑人。佢話：「佢當時只係企喺度，乜都冇做，只係食緊嘢。」
襲擊發生後唔久，幾名警察仍然喺瑞士庭旁嘅現場，該地點就喺廣場旁邊嘅LEGO商店附近。喺犯罪現場嘅警戒線後方，可以見到地上有物品，包括一個綠色打火機、一頂黑色帽同沾有血跡嘅餐巾紙，遠處仲聚集住一小群人。喺 TWG 茶店內仲可以見到醫療急救包。
倫敦救護服務嘅一名發言人表示，救護人員喺當地時間朝早十一點三十六分接到有關受傷事件嘅報告後趕到現場。佢哋表示：「我哋向現場派遣咗包括救護車組、資深急救員同事件應對官喺內嘅資源。我哋仲派遣咗戰術應對小組成員。我哋喺現場對一名兒童同一名成人進行咗治療，並將佢哋送往重大創傷中心。」
倫敦警察局嘅探長克里斯蒂娜 · 傑莎向勇敢介入呢次事件嘅員工同公眾成員致敬，稱：「佢哋將自己置於險境，展現咗倫敦最美好嘅一面。」佢補充話，調查人員正努力確定嫌疑人嘅作案動機，並敦促任何目擊咗事件或者有任何資訊嘅人聯絡警方。
