英國新聞 西西里海岸遊艇沉沒事件 最後一名失蹤者遺體被發現 23-8-2024
Added 2024-08-23 14:53:47 +0000 UTC
潛水員喺西西里海域沉沒嘅豪華遊艇殘骸中發現咗18歲嘅漢娜 · 林奇嘅遺體。喺意大利巴勒莫以東嘅漁村波爾蒂切洛附近，豪華遊艇 Bayesian 喺一場突如其來嘅風暴中沉沒，總共導致七人喪生，漢娜係呢次事故中最後一位失蹤嘅乘客。佢嘅朋友形容佢個人又靚又帶比人溫暖，而佢嘅老師就稱讚佢非常醒目。而佢嘅父親、科技企業家米克 · 林奇嘅遺體喺今個星期早啲時候從沉船中被打撈出嚟。
一名發言人喺聲明中表示：「林奇家族感到極度悲痛同震驚，並正由家人同朋友提供安慰同支持，佢哋嘅心意同所有受呢場悲劇影響嘅人同在。佢哋真誠感謝意大利海岸警衛隊、緊急救援人員以及所有參與救援嘅人士。佢哋而家唯一嘅請求係，喺呢個無法言喻嘅悲痛時刻，請尊重佢哋嘅隱私。」
麥克 · 林奇嘅密友兼同事蘇豪凡 · 侯賽因 Sushovan Hussain 表示，佢同妻子對好多摯友嘅去世感到「完全崩潰」。佢哋表示︰「由漢娜出世開始我哋就認識佢，佢喺生命嘅光明嘅時刻被奪走性命，呢種殘酷難以置信。而米克係我所認識嘅人之中擁有最聰明嘅頭腦，亦係最關愛他人嘅人。」另一位密友安德魯 · 簡特 Andrew Kanter話︰「佢對生命、知識以及周圍所有人嘅熱情，對每一個遇見佢嘅人都產生咗立即嘅啟發，佢將會被深深懷念。」
意大利海岸警衛隊發表聲明稱，隨住漢娜 · 林奇嘅遺體被打撈，救援行動已經結束，並確認共有七人喪生。倖存者包括一名一歲嘅小朋友同漢娜嘅母親安祖娜 · 巴卡雷斯。摩根士丹利國際銀行主席莊拿芬 · 布魯馬及其妻子朱迪 · 布魯馬，克利福德 · 昌斯律師事務所律師基斯 · 莫維洛及其妻子內達 · 莫維洛，以及遊艇上嘅廚師雷卡度 · 湯馬斯都喺呢場災難中喪生。
救援人員描述今次由星期一持續至今嘅行動「非常複雜」，因為潛水員每次只可以進行12分鐘嘅水底救援。喺最後一具遺體被發現嘅報導傳出之後，一艘喺沉船事故現場駐留咗幾個鐘嘅海岸警衛隊船隻已經返回港口。同時，一架直升機喺附近降落，潛水員喺碼頭上脫下橙色嘅潛水服。意大利海岸警衛隊嘅一名發言人表示，目前係咪要將沉沒嘅遊艇從海底打撈上嚟嘅決定「唔喺議程上」，但未來可能會考慮。根據搜救隊嘅潛水員所述，呢艘船喺海底「幾乎保持完整」。
據《泰晤士報》報導，漢娜 · 林奇最近啱啱完成咗 A-level 考試，並獲得咗牛津大學英語專業嘅錄取名額。漢娜曾經就讀喺位於哈默史密斯嘅倫敦萊特米爾高級中學，該校嘅發言人表示：「我哋都對呢個消息感到非常震驚。我哋嘅心意同佢嘅家人以及所有相關嘅人同在。」
漢娜嘅同學格蕾西 · 利亞形容佢「容易被人喜愛：真誠、投入、極具智慧而且非常善良。我會永遠記得佢嘅笑容。」
